कोल्हापूर - येथील वाळूची बेकायदा चोरटी वाहतूक करणारे १४ ट्रक पोलिसांनी जप्त केले.
पुढील कारवाईसाठी हे ट्रक करवीर प्रांत कार्यालयाकडे सुपूर्द करण्यात आले आहेत.
या कारवाईने वाळू तस्करांना दणका बसला आहे.
राजारामपुरी पोलीस ठाण्याच्या हद्दीत असलेल्या आयसोलेशन हॉस्पिटल परिसरात शहर पोलीस उपअधीक्षक प्रेरणा कट्टे या गस्त घालत होत्या.
त्यांना या हॉस्पिटलच्या जवळ वाळूचे ट्रक उभे असल्याचे दिसले. त्यांनी चौकशी केली असता या ट्रक चालकांकडे वाळूचे स्वामित्वधन भरल्याच्या पावत्या मिळाल्या नाहीत.
बेकायदेशीररीत्या वाळू वाहतूक केली जात असल्याचे आढळून आल्याने त्यांनी १४ ट्रक जप्त केले.
यामुळे वाळू तस्करीचा विषय पुन्हा एकदा चव्हाटय़ावर आला आहे.
